Mayol gihubuan og bakus ni Romero

CEBU, Philippines - Milampos ang Mehikanong si Omar Nino Romero sa paghubo sa WBC light flyweight title ni Rodel Mayol pinaagi sa unanimous decision nga kadaugan sa ilang rematch kagahapon didto sa San Juan del Rio sa Queretaro, Mexico.

Sa ikaduha nilang sangka karong tuiga, wala na usiki ni Romero ang kahigayunan nga masakmit ang bakus sa Sugbuanong boksidor. Human sa dose ka hugna nga sinumbagay, tulo ka mga hurado miiskor og 115-112, 117-109, ug 115-111 pabor ngadto ni Romero.

Tam-is kini nga kadaugan alang ni Romero human usab sa kontrobersiyal nga technical draw nga nahitabo sa una nilang sangka ni Mayol niadtong Pebrero 27, diin nagpabilin ni Mayol ang bakus nga maoy hukom sa WBC.

Nakita ang kaagresibo ni Romero kinsa mipatugpa og mga nagpungasi nga kombinasyon nga mipaatras ni Mayol sa round eight diin nakita sa mga hurado ang pagka-dominante sa beteranong Mehikano.

Aduna untay kahigayunan nga mamawi si Mayol human mikusug ang pag-agas sa dugo sa kilay ni Romero human sa nahiaguman niining gisi sa round 7, apan pakyas ang lumad nga taga-San Fernando nga pahimuslan kini tungod kay nagpunay nalang kini og panagang.

“It was a tough physical fight. Nino seemed to land the better combination of punches. He appeared to stun Mayol with a series of punches in a very strong round eight” matud pa ni Mark Vester sa boxingscene kinsa personal nga mitan-aw sa away.

Sa maong kadaugan si Romero misaka ngadto sa 29-3-2, 11KOs, samtang ang bata ni Manny Pacquiao sa MP Promotions nga si Mayol natagak ngadto sa 26-5-2, 20KOs. – BANAT NEWS