CEBU, Philippines - Lima ka teams ang mopakita'g aksiyon sa 2010 Jaycees Basketball Association (JBA) Metro Cebu Uptown Jaycees basketball tournament nga mosikad karong Hunyo 23 diha sa City Sports Club-Cebu gym sa Cebu Business Park.
Si tournament committee chairman Engr. Reeve Jumawan nagkanayon nga ang lima ka teams mao ang Threesome Events/Sticker World Advertising, Savers Home Depot, Sherilin Plastics, Mang Inasal ug ang AMBL/ACDC.
Matud ni Jumawan nga ang kompletong iskedyul ug ingon man ang ngan sa tanang players ipagawas karong Martes.
Aron maseguro nga balanse ang tanang teams, ang tanang sakop sa Metro Cebu Uptown Jaycees miuyon nga bolahon ang tanang mga maayong laking sentro, forwards ug point guards aron sila mahatag ngadto sa mga teams diin kinahanglanon kaayo ang ilang tagsa-tagsa ka posisyon.
Ang mga duwa nga pagahimuon sa adlaw'ng Miyerkules sa alas-7:30 sa gabii ug sa Domingo sa alas- 5:30 sa hapon, mosubay og single round robin format.
Ang mga lagda ug ubang mga pamaagi sa torneyo gituki pag-ayo sa miaging adlaw atol sa ilang general membership meeting didto sa Mango Park Hotel nga gipatawag ni Metro Cebu Uptown Jaycees incoming president Carlos Porras, Jr.
Ang liga pagadumalon ni commissioner Robert 'Bobby Knight' Inoferio, kinsa mao sab ang presidente sa Sports Communicators Organization of the Philippines (SCOOP)-Cebu Chapter. (BANATNEWS)