Yellow midaog sa Violet

CEBU, Philippines - Wala kapugngi si Amay Palad sa iyang pagmangtas diin mihansak kini og 28 puntos aron pangulohan ang Yellow team pagposte'g 79-70 nga kadaugan batok sa team Violet sa nagpadayong aksiyon sa Phase 3 Camella Homes Sunday Basketball Club tournament niadtong Domingo didto sa Villa Magallanes gym sa Lapu-Lapu City.

 Gawas ni Palad, laing duha ka players ang mi-iskor og double figures alang sa Yellow. Si Roilan Sumilang miantog og 14 puntos, samtang si Alan Sepe miugkat og 11 puntos alang sa Yellow nga nagbitbit na karon og 2-2 nga baraha.

Kondisyon unta si Rolly dela Pieza, kinsa misansan og 18 puntos, apan nakawang lang ang iyang mga paningkamot kay wala niya mahatod ang Violet team ngadto sa kadaugan.

Si Dela Pieza maoy topscorer sa Violet, gisundan ni Centes Brañanola pinaagi sa iyang 13 puntos, samtang si Openg Ragaza igo lang mi-iskor og nuybe puntos.

Sa laing aksiyon, ang Kinship Trading mikulit sa ikatulo nilang daog pinaagi sa pagpilde sa Rylle Trucking sa iskor nga 101-91.

Si Dante Gilig maoy nangulo sa Kinship Trading sa iyang 32 puntos, samtang ang pilderong Rylle Trucking gipangulohan ni Morata, kinsa mikambiya og 28 puntos.

Puntos Matag Usa

Unang duwa:

YELLOW (79) - Palad 28, Sumilang 14, Sepe 11, Geraldez 9, Rabi 6, Maratas 5, Villapez 4, Tabaña 2

VIOLET (70) - R. Dela Pieza 18, Brañanola 13, Ragaza 9, Cortes 8, D. Dela Pieza 7, Balberona 7, Aparente 4, Pleños 2, Almacin 2

Ikaduhang duwa:

KINSHIP TRADING (101) - Gilig 32, Amores 19, Casquejo 13, Panaguiton 10, Andrino 8, Rosatase 8, Pleños 7, Dela Pieza 4

RYLLE TRUCKING (91) - Morata 28, Casquejo 20, Tabalok 18, Amodia 16, Dela Pieza 4, Palad 4, Oyanib 1. - BANAT NEWS