Catajara mipaundang ni Taruc sa Summit Fight Night

CEBU, Philippines - Yano kaayong gidispatsar ni Ken Jake Catajara ang iyang kontrang si Elecion Taruc sa 2010 Summit Natural Drinking Water Fight Night Amateur Series didto sa Mandaue Central Plaza.

Ang garbo sa Talamban National High School nga si Catajara mirapido og mga solidong suntok nga maoy nakapaaghat ni Taruc sa Lapu-Lapu pagsurender sa nahabiling 45 segundos sa round 1 sa 42 kgs. class.

Apan duha sa iyang mga teammates nga sila si Jessie Boy Mansan ug Joedel Patindol ang nangaparot batok sa tagsa-tagsa nila ka mga kaatbang.

Si Mansan miluhod ni John Lloyd Transponte ubos sa 34 kgs. class, samtang si Patindol gipaundang ni Jomar Caspe sa Cabancalan sa 24 kgs. division.

Gawas ni Caspe, mitunol sab og daug alang sa Cabancalan mao si Cherwellan Cantel human niya gipilde si Jemar Rosal.

Duha ka Mandauehanon nga sila si Junille Olivares sa Basak ug Jeramel Alcover sa Alang-Alang ang mikulit sab og daog batok sa tagsa-tagsa nilang kaatbang. 

Si Warren Mayormita sa Badian mibuntog sa iyang katagilungsod nga si Adrian Castañeda.

Mikompleto sa mga midaog mao si Christian Bacolod sa Mabolo, Dominique Casañares sa Bacayan, Richard Barrios sa Bais City, Hepolito Banal sa Ermita ug Danlou Codilla sa University of Visayas (UV). – BANAT NEWS