Ave Maria mipilde sa Ace Penzionne

CEBU, Phillipines - Miugkat na sab og laing daog ang Ave Maria Sanctuary Park pinaagi sa paglumpag sa Ace Penzionne, 57-49 sa nagkainit nga aksiyon sa LLBA Rollway Cup 2010 basketball tournament didto sa Villa Magallanes gym sa Lapu-Lapu City.

Ang Ave Maria naglabaw og singko puntos, 18-13 luyo sa mga paningkamot ni Ondo Cadungog ug mitubo pa ang labaw ngadto sa double digits, 44-34 paingon sa final period.

Bugtong konsolasyon sa Ace Penzionne mao ang pagkitkit sa labaw ngadto na lang sa siyete puntos, kay ang Ave Maria walay puas nga namunit og mga puntos alang sa ilang ikatulong kadaugan.

Si Cadungog, kinsa mipupo og 15 puntos maoy nangu sa Ave Maria, samtang ang naparot nga Ace Penzionne gipangulohan ni Baguio sa iyang 19 puntos, gisundan nilang Buldog Ybañez ug Tojeno nga miariya og nuybe puntos matag usa.

Sa laing aksiyon, ang Verlex mikulit sa ilang ikaduhang daog pinaagi sa paglubong sa Roro Trans sa iskor nga 78-57.

Si Pompie Ngujo mirehistro sa iyang game-high 30 puntos aron pangulohan ang Verlex nga nagbitbit og 2-1 nga baraha.

Ang Roro Trans gipangulohan ni Alan Sepe, kinsa mipabuto og 22 puntos.

Ang LLBA-Rollway Cup gipaluyohan sab sa Comfa General Merchandise ni Ely Gomoz ug D'House of Sports ni Billy Nadado (tel. no. 340-3814).

Puntos Matag Usa

Unang duwa:

VERLEX (78) - Ngujo 30, Pardilla 11, Intung 9, Augusto 8, Dignos 8, Bardago 8, Coming 5, Sagarino 2

RORO TRANS (57) - Sepe 22, Dignos 11, Bensi 10, Patalinghug 6, De Jesus 6, Sumilang 4, Almasin 2

Ikaduhang duwa:

AVE MARIA (57) - Cadungog 15, Dela Rama 8, Aying 8, Guido 5, Nadado 5, Dorig 5, Baricuatro, Berdago 2

ACE PENZIONNE (49) - Baguio 19, Ybañez 9, Tojeno 9, Glen 5, Manlangit 4, Portugaliza 3, Pangatungan 2, Lapoja 2. – BANAT NEWS