Green hari sa 35-above sa 4th Thursday Club summer basketball league

CEBU, Philippines - Naka-eskapo ang Green team bitbit ang 90-89 nga kadaugan batok sa Black team aron pagsakmit sa 35-above title sa 4th Thursday Club Summer Basketball League didto sa Brgy. Jugan, Consolacion.

Si Dadud Bagundol milansang og 16 puntos, samtang sila si Waning Luaña ug Victor Khon nagkumboya og 28 puntos alang sa Green nga wala gyud maluya bisan pa sa   presyur nga gipatuman sa Black sukad miposte og 45-38 nga bentaha.

Si Alfon Pepito mao sab ang nangu sa Black nga mirehistro og 18 puntos, gisundan ni Carlos Sasing, ang tournament MVP nga adunay 17 puntos.

Si Bobot Pepito maoy giila isip Most Defensive Player, si Pepito maoy gikoronahan isip 3-point king, samtang si Hon. Jaime Pilapil misakmit sa Most Improved Player award.

Sa gubat alang sa ikatulong dapit, ang Blue milubong sa White, 73-62.

Si Jerry Jamila maoy init nga magduduwa sa Blue nga mirehistro og 16 puntos, samtang laing tulo niya ka teammates ang mitampo og double figures. Sila si Marlito Jubay ug Tony Pepito parehong mipugnit og 13 puntos, samtang si Jumar Cabahug mihirit og 12 puntos.

Ang kalihukan   gipasiugdahan sa Thursday Club sa pagpangulo sa ilang presidente Dado Ygot ug bise presidente Boboy Pepito.

Gisuportahan sab kini sa Jugan barangay council ubos sa liderato ni Brgy. Capt. Dada Gielcheck.

PUNTOS MATAG USA

Unang duwa:

(For 3rd place)

BLUE (73) - Jamila 16, Jubay 13, Pepito 13, Cabahug 12, Pepito 6, Tajale 6, Nueña 4, Ramos 4

WHITE (62) - Secretaria 12, Gonzaga 10, Rodgiro 8, Labayan 8, Ygot 4, Mariñas 4, Molina 4, Brigoli 4, Beduya 4, Arong 3

Ikaduhang duwa:

(Championship)

GREEN (90) - Bagundol 16, Luaña 15, Kho 13, Pepito 12, Pastoriza 10, Borces 8, Valle 8, Maglasang 2

BLACK (89) - Pepito 18, Sasing 17, Taborada 14, Ernie 14, Casquejo 9, Cabahug 2, Pilapil 2, Sebial 2, Ganub 2, Pepito 1 (BANATNEWS)