CEBU, Philippines - Gisubhan dayon og daug ang USJR Jaguars- Ave Maria Sanctuary Park sa una nilang sangka dihang ilang gipukan ang Mandaue Selection sa iskor, 83-72 atol sa pagbukas sa kanidtong Sabado sa nagpadayong three-day 3rd Baybay Charter Day basketball tournament didto sa Baybay, Leyte.
Ang Ave Maria ni team owner Raffy Senining kinahanglan lang modaug sa sunod nilang duwa batok sa lokal team gikan sa Leyte ang Gabisan Shipping aron segurado silang mo-abante ngadto sa finals ug matangag ang P80 mil nga ganting cash. Ang Gabisan Shipping gipalig-onan nilang ex-pro Leo Bat-og ug pipila ka mga commercial veterans nga sila si Doroteo Almacin, Gerry Cavan ug Eliud Poligrates kauban sa mga lokal nga players sa Leyte.
Si Jercules Tangkay mipakitag katakos sa maong duwa ug mibahug siya’g 18 puntos aron pangulohan ang opensa sa Ave Maria samtang nag-igo sa iyang tirada sa gawas si Jabe Delfino aron modugang og 16 puntos.
Laing upat ka teammates ang mi-iskor sab og double figures alang sa Ave Maria diin sila si Danny Aying ug Jonel Baribe parehong miposa og 12 puntos samtang sila si Michael Luga ug Ronan Isidro parehong miamot og 10 puntos matag usa.
Ang kanhi USPF-Panther guard nga si Arletroy Mercader maoy nangu sa Mandaue Selection sa iyang 24 puntos samtang sila si Frangel Omolon ug Alex Cainglet midugang og 11 ug 10 puntos matag usa. Wala maka-iskor si Luther Luke Justiniani apan wala sab maka-iskor sila si Ritchum Dennison ug Mark Manigque tungod sa ilang hugot nga depensa.
Puntos matag usa:
Ave Maria (83)— Tangkay 18, Delfino 16, Aying 12, Baribe 12, Luga 10, Isidro 10, Ponce 7, Malinao 4, Colegado 2, Doy 2
Mandaue (72)— Mercader 24, Omolon 11, Cainglet 10, Filoteo 9, Elim 6, Garcia 5, Cantonao 5, Benedicto 2. – BANAT NEWS