J&D squad naka-ipsot sa Ver-Son sa 3rd Norvic Abella's Cup

CEBU, Philippines - Nangayo pa og overtime ang unseeded J&D squad ni skipper Daks Donggon una pa sila maka-eskapo bitbit ang 67-64 nga kadaugan batok sa Ver-Son Maroon aron magpabiling buhi sa semifinals sa 3rd season sa Norvic Abella’s Cup 2010 summer basketball tournament niadtong miaging adlaw didto sa Labangon open court, ning dakbayan.

Si William Caster sa J&D maoy naghatod sa duwa ngadto sa overtime human niya gitabla ang iskor sa labing unang higayon, 61-all pinaagi sa usa ka perimeter jumpshot sa katapusang singko segundos.

Siya sab ang miduslit sa third quarter rally diin misikit ang J&D sa iskor nga 41-43 human   sila pahamtangi'g 16 puntos nga lubong sa halftime, 20-36.

Sa overtime, gipahugtan sa J&D ang ilang depensa aron pugngan ang ilang Ver-Son ngadto lang sa tres puntos batok sa naantog nilang sayes puntos.

Si Junrey Guimarangan miposa'g 15 puntos aron pangulohan ang J&D, samtang si Dane Abella mihakot og 12 puntos.

Si Caster miabuno'g 11 puntos ug si Ronel Cortes mi-iskor og 10 puntos.

Sa sayo pa, ang Ponteras Farms ni playing coach Greg Ponteras midaog sab batok sa RCAF sa iskor nga 69-60 aron sab makapugos og playoff.

Si Giber Amores maoy nangu sa Ponteras Farms pinaagi sa iyang 18 puntos, gisundan ni Digoy Ceros nga adunay 12 puntos. Ang pilderong RCAF gipangulohan sab ni Jong Wilbur, kinsa mibugha'g 14 puntos.

Puntos Matag Usa

Unang duwa:

Ponteras (69) - Amores 18, Ceros 12, R. Tabasa 11, W. Ponteras 10, J. Tabasa 7, Pilarca 4, Sta.Rosa 2, Restauro 2, Cinco 2, G. Ponteras 1

RCAF (60) - Wilbur 14, Baclay 11, Lozarita 10, A. Tabasa 10, Alguno 7, Rodriguez 4, Faunillan 4, Dacuyan 2

Ikaduhang duwa:

J&D (67) - Guimarangan 15, D. abella 12, Caster 11, Cortes 10, Cabasan 7, Donggon 4, Jabonero 4, Mosqueda 2, Bacus 2

Ver-Son (64) - Kintanar 14, Sarucam 13, G. Sabanal 13, Dacuyan 8, Navaroo 6, Mamalias 6, Tapere 4. – BANAT NEWS