Pagkaplag og talento tuyo sa IPI-Omega Boxing Gym

CEBU, Philippines - Pagmugna ug pagpalambo sa talento sa mga boksidor aron maoy morepresentar sa nasud sa nagkalain-laing kalibotanong kampiyonato, maoy tuyo ug tumong sa International Pharmaceuticals Inc. (IPI) sa ilang pagtukod og Omega Boxing Gym.

Si IPI CEO Pio Castillo Jr. nagkanayon nga gawas sa pag-promote sa ilang mga produkto, usa sab sa ilang punto mao nga aron matabangan ang mga aspiring boxers sa pagpakita sa ilang potensiyal.

“We want to support upcoming boxers, especially to those who have the heart for boxing,” matud pa ni Castillo atol sa pag-abli sa ilang bag-ong gym diha sa Juan Avenue (kanhi De dela Montaña) sa Mabolo, ning siyudad.

Si Castillo maoy nangulo paghatag og suporta alang sa training sa mga amateur ug professional boxers nga nagagikan sa silinganang mga probinsiya sa Sugbu.

Nakamugna na sila'g walo ka professional boxers nga sila si Johnriel Casimero, Jason Canoy, Riel Mandate, Edison Serrano, Jayme Payoa, Vergilio Silvano, Romeo Urpanel ug Crispen Barba.

Si Casimero, usa sa mga professional boxers kinsa nagbansay sa Omega Boxing ug Workout Gym nga naghatag og   dungog dili   lang   ngadto sa IPI   kun dili   sa     nasud   nga Pilipinhon   human midaog sa WBO Interim light flyweight title.

Sa laing bahin, si Omega Boxing Gym manager James Osorio, miingon   nga mopahigayon sila og mini tournaments sa mga probinsiya ug kabarangayan dinhi sa Sugbu nga maoy ilang gamiton aron makakaplag og mga amateur prospects.  – BANAT NEWS