Cotto mipahunong ni Foreman sa 9th

CEBU, Philippines - Gipakuratan ni Puerto Rican Miguel Cotto ang tibuok Yankee Stadium human kini milampos pagsakmit sa WBA junior middleweight title pinaagi sa pagpukan sa mas daku ug mas taas nga si Yuri Foreman kagahapon.

“I proved this night, everybody who said Miguel Cotto was finished, everybody failed,” matud pa ni Cotto kinsa mihalad sa iyang kadaugan ngadto sa mitaliwan niya nga amahan nga si Miguel Cotto Sr.

Sukwahi sa gituohan sa kadaghanan, mas mipatigbabaw ang kusug ni Cotto batok sa mas daku nga si Foreman kinsa kanunay lang naigo sa mga mahait nga jab sa Puerto Rican.

Nagsugod ang suliran ni Foreman sa seventh round human siya madakin-as nga miresulta sa pagkapiang sa iyang tuong tuhod, tungod niini misamot ka agresibo si Cotto kinsa mipauwan og kinumo ngadto sa nagtakiang nga si Foreman.

Sa misunod nga round, diriyot na misurender ang korner ni Foreman human nila gilabay ang puti nga labakara sa ring, apan gipakita gihapon ni Foreman ang iyang kaisug human kini nakahukom nga mopadayon.

Hingpit nga gitapos ni Cotto si Foreman sa round 9 pinaagi sa pagpatugpa og makusug nga hook ngadto sa lawas ni Foreman kinsa miluhod sa nahibiling 42 segundos sa away.

Si Cotto kinsa unang higayun nga mi-away sa 154 lbs division mipalambo sa iyang record ngadto sa 35-2, 28KOs, samtang si Foreman nakahiagum sa labing una niyang pilde sud sa 29 ka away. Lemuel P. Maglinte gikan sa AP