Looney Tunes Run mosikad karon

CEBU, Philippines - Magginukdanay na ang mga bata nga maoy bida karon sa pagsikad sa Looney Tunes Active Run sayo ning buntag diha sa Northwing parking lot sa SM City-Cebu.

Kapin sa 1,000 ka mga runners, diin 350 niini mga bata ang managan sa Cebu leg sa Looney Tunes Run nga gipasiugdahan ni Ironman of the Philippines Noy Jopson ug international marathoner Rio dela Cruz.

Gawas sa naandang 10K, 5K ug 3K run, ang lumba nga gidesinyo alang sa mga kabataan naglakip usab sa 1.5K, 1K run ug 500 meter dash.

Misaad ang mga sponsors nga mohatag og mga birthday package alang sa top finishers sa 1.5K, 1K ug 500 meter, samtang ang Timex moapod-apod og relo alang sa first placer sa matag dibisyon.

Masaksihan karon ang katapusang panag-abot sa higpit nga karibal nga si Kenyan Missionary Simon Losiaboi ug RP team member Mendel Lopez sa 10K men's open.

Ang duha ka Cebu-based runners maningkamot karon nga modaog batok sa usa'g-usa sa dili pa sila mobiya dinhi sa Sugbu aron atubangon ang tagsa-tagsa nila ka responsibilidad.

Si Losiaboi mopauli didto sa iyang nasud sa Kenya, apan misaad kini nga mobalik alang sa 2nd Cebu City Marathon sunod tuig, samtang si Lopez molarga paingon ngadto sa Manila aron gahinan og panahon ang iyang review sa Geodetic Engineering.

 Sa women's division, si Mary Grace delos Santos mao gihapon ang top female contender uban nila ni Mary Joy Tabal sa Southwestern University (SWU) ug Madelyn Carter. – BANAT NEWS