CEBU, Philippines - Panalipdan sa labing unang higayun ni ALA Boy Rocky Fuentes ang iyang Oriental Pacific Boxing Federation (OPBF) flyweight title ugmang adlawa didto sa Korakuen Hall sa Tokyo, Japan.
Si Fuentes (25-6, 15KOs) gitakdang makigharung sa Hapon nga si Shigera Ikehara (20-1, 16KOs) kinsa nailhan dihang gipatumba niini ang Pinoy nga si Gilbert dela Torre sulod sa duha ka round niadtong tuig 2007.
Ang garbo sa Brgy. Mambaling, Cebu City nga si Fuentes anaa na karon sa Japan uban ang iyang mga trainers nga sila si Edito Villamor ug Joseph Baldago.
Si Fuentes padayon karon nga mipanday sa iyang ngalan isip usa sa mga Pinoy boxing prospect, katapusang napilde niadtong tuig 2007 batok ni Richie Mepranum pinaagi sa unanimous decision.
Ang 24-anyos nga si Fuentes kinsa mirehistro karon og lima ka sunod-sunod nga daog, misakmit sa titulo OPBF title niadtong Marso 9 human sa iyang majority decision nga kadaugan batok ni Masafumi Okubo didto sa Japan. – BANAT NEWS