Halo-halong panglantaw sa NBA finals

CEBU, Philippines - Sugdan na ugma ang 2010 NBA Finals tali sa top-seeded Los Angeles Lakers pinangulohan ni Kobe Bryant batok sa fourth-ranked Boston Celtics ni Paul Pierce diin ang Game-1 ug Game-2 adto himuon sa Staples Center sa Los Angeles, California.

Mga ekspertong NBA analysts sa Estados Unidos nga sila si Adrian Wojnarowski, Marc Spears ug Johnny Ludden   parehon mitagna nga Lakers maoy ma-champion sa Game 7.

Dinhi sa Sugbu, sa top three coaches sa Cebu Schools Athletic Foundation, Inc. (CESAFI), si Elmer 'Boy' Cabahug sa 9th-time champion University of the Visayas (UV) Green Lancers lang ang mipili sa Boston Celtics, samtang sila si Roel Gomez sa University of Cebu (UC) ug si Edito Salacut sa University of San Jose-Recoletos (USJ-R) parehong mipabor sa Lakers.

Ang multi-titled coach nga si Raul 'Yayoy' Alcoseba sa M. Lhuillier-Cebu Niños ang midapig sa Lakers ingon man ang iyang assistant nga si coach Tata Merced sa Asian College of Technology (ACT) Cyber Knights.

Apan si CESAFI commissioner Felix O. Tiukinhoy, Jr. midapig sa Boston, samtang ang iyang deputy commissioners nga sila si Julian Macoy ug Danny Duran managlahi og panglantaw. Si Macoy karaang Boston fan ug si Duran karaang Lakers fan.

Si UC team manager Atty. Baldomero C. Estenzo nagkanayon nga Boston maoy mogawas nga kampiyon sa Game-6. Ang basketball patron nga si Lorenzo 'Chao' Sy sa La Fortuna Bakery didto mipabor sa Lakers.

Ang hepe sa Cash Division sa Bureau of Customs nga si Rady Abarintos ug broker Roy Canillas   mitagna nga ang Boston maoy makampiyon. – BANAT NEWS