Niños vs. Landmasters sa TOP tune-up

CEBU, Philippines - Agi’g pagpangandam alang sa Tournament of the Philippines (TOP), ang two-time Liga Pilipinas national champion M. Lhuillier Kwarta Padala-Cebu Niños mopahigayon og tune-up game batok sa Mandaue City Landmasters karong Sabado sa alas-6 sa gabii diha sa Mandaue City Cultural and Sports Complex.

Ang Niños ni team owner Michel J. Lhuillier ug legendary coach Raul 'Yayoy' Alcoseba mopahigayon sa katapusan nilang preparasyon alang sa ilang pagsalmot sa TOP, usa ka liga diin giusa ang Philippine Basketball League ug Liga Pilipinas nga sugdan karong Hunyo 9 didto sa Manila.

Makit-an sab sa labing unang higayon ang abilidad ni Fil-Am guard Shawn Weinstein, kinsa maoy gikuha sa Niños sa miaging TOP Rookie Draft. Nabalik usab sa line-up sa Niños si ex-PBA cager Warren Ybañez.

Kompletong line-up sa Niños naglakip nilang Bruce Dacia, Stephen Padilla, Abby Santos, Marlon Basco, Ariel Mepaña, Mark Magsumbol, Mark Ababon, Hafer Mondragon, Nat Cruz ug Franklin Nailon.

Si Woodrow Enriquez dili pa makaduwa kay padayon pa kining nagpaalim sa iyang cervical injury.

Sa ilang bahin, ang Landmasters ni team owner Joe Soberano ug head coach Al Solis gilangkuban sa mga beterano ug kanhi collegiate stars sama nila ni Jet Latonio, Alano Caputolan, Rino Berami, Michael Luga, Ronald Bucao, Chris Victor Diputado, Ritchum Dennison, Eric Zanoria, John Villaver ug Jay-R Gerilla. – BANAT NEWS