CEBU, Philippines - Maoy nanghawod ang Dumanjug District Swim Team sa bag-o lang natapos nga Speedo BSP Novice Swim Meet 2010 kagahapon didto sa Boys Scout Camp sa Capitol Hills, ning siyudad.
Ang Dumanjug tankers mihaw-as isip over-all champion dala ang 391 puntos human sila mipupo'g 64 ka gold, pito ka silver ug 19 ka bronze medals.
Nagsunod ang Bohol Aquatic Sports Swimming team, kinsa mirehistro og 384 puntos ug Sacred Heart Center nga adunay 336 puntos alang sa ikatulong dapit.
Mi-okupar sa ikaupat ug ikalimang luna mao ang Maria Montessori International School (257 points) ug Talisay City Lifesavers (194 points).
Mikompleto sa top 10 placers mao ang Pool Pirates Swim team (160), Talisay Aquanauts(145), University of San Jose-Recoletos (57), Cebu Lifesavings Aquatic Sports (30) ug University of San Carlos nga adunay sayes puntos.
Namupo usab og individual awards ang Dumanjug pinaagi nila ni Dominic Noel nga maoy top performer sa boy’s 7-8 class ug Vins Eduardo Samson sa boys’ 11-12 class.
Si Jun Justin Medrano mao ang hari sa boys 6-under, samtang ang Boholanos nga sila si Kyle Christian Lim ug Dominic Romaos maoy top swimmer sa boy's 9-10 ug boy's 13-over class.
Si Chloe Alvarez sa 6-under class ug Alyanna Madarang sa 7-8 class mihatag og dungog sa Maria Montessori, samtang si Nieca Aella Parrenas ug Kristen Charmaine Kanen sa Sacred Heart maoy nanghawod sa 9-10 ug 11-12 divisions.
Wala usab magpa-alkanse ang Aya Saint Abejo sa USJ-R nga maoy hawod sa 13-above category. (BANATNEWS)