Xmen 1 makigsangka sa USJ-R Varsity sa semifinal

CEBU, Philippines - Gitapos sa Ave Maria Sanctuary Park-Xmen 1 ang elimination round isip no. 1 seed human ilang gipalagpot ang Aces, 76-70 sa Talamban Open summer basketball league didto sa Talamban gym.

Ang Xmen 1, kinsa maoy no. 1 sa semifinals, makigsangka batok sa igsuong koponan ug fourth-ranked USJ-R Varsity.

Ang Ave Maria Xmen 2 nga gipangulohan nilang Aldrin Ocañada, Jerry Jaca ug Danny Aying, maoy no. 2 seed ug ilang sangkaon ang no. 3 Asian College of Technology (ACT) Cyber Knights ni coach Tata Merced.

Si kanhi UV Lancer Jaymar Canoy, miposa'g 12 puntos aron pangulohan ang Xmen 1, samtang si Christian Senining, ang anak sa team owner nga si Raffy Senining, miamot og otso puntos.

Si Michael Cantonao, ang pambato sa USC Warriors maoy nangu sa Aces sa iyang 23 puntos, samtang sila si Demo Filoteo ug Mel Steven Duran nagkumboya og 23 puntos.

PUNTOS MATAG USA

Ave Maria Xmen1 (76) - Canoy 12, Senining 8, Baribe 8, Justiniani 8, Malinao 6, Ponce 6, Gabas 5, Colegado 5, Hatague 4, Pogoy 3, Tagalog 2

Aces (70) - Cantonao 23, Filoteo 12, Duran 11, Sabellon 7, Felisario 6, Panerio 2, Tangarorang 2, Elim 2   (BANATNEWS)