Ave Maria Gisugat og daog

CEBU, Philippines - Ang Ave Maria Sanctuary Park milubong sa una nilang daog human gipilde ang John Videoke, 70-63 sa nagpadayong aksiyon sa LLBA Rollway Cup 2010 basketball tournament niadtong Lunes sa gabii didto sa Villas Magallanes gym sa Sta. Lucia Property sa Lapu-Lapu City.

Nagkamang ang Ave Maria ug pirme kining naggukod gikan sa pagsugod hangtod nga nahuman ang halftime, 32-33 pabor sa John Videoke. Misamot ang kalbaryo sa Ave Maria dihang nigradwet ang usa sa ilang sinaligan nga si Dindo dela Rama nga nakapabentaha'g maayo sa John Videoke paghuman sa maong kuwarter, 55-48.

Sa kombinasyon nilang Ondo Cadungog, Ron-Ron Aying ug Bernard Arac, napahakan ang labaw ug hinay-hinay nga giilog sa Ave Maria ang tiyempo sa duwa hangtod nga nakab-ot sa hingpit ang siyete puntos nga kadaugan.

Tulo ka players sa Ave Maria ang mihimo'g double figures nga gipangulohan ni Cadungog pinaagi sa iyang 17 puntos, gisundan ni dela Rama nga adunay 16 puntos ug   Aying   nga miariya'g 10 puntos, samtang si Arac adunay otso puntos.

Ang Ave Maria ni team owner Raffy Senining ug team manager Billy Nadado adunay 1-0 nga baraha, samtang ang John Videoke ni team owner Ely Gomoz adunay 1-1 nga baraha.

Si Lito Magat milansang og 25 puntos ug si Dante Villaflor mitimbre og 15 puntos alang sa pilderong John Videoke.

Ang torneyo gipaluyohan sab sa Rollway Customs Brokerage ni Rolly dela Pieza.

Puntos Matag Usa

AVE MARIA (70) - Cadungog 17, Dela Rama 16, R. Aying 10, Arac 8, Baricuatro 6, G. Aying 6, Nadado 4, Bergado 3, Cosep 2

JOHN VIDEOKE (63) - Magat 25, Villaflor 17, Giganto 5, Tayag 4, Aton 4, Gomoz 4, Daño 4. – BANAT NEWS