CEBU, Philippines - Gibana-banang moabot ngadto sa 200 shooters gikan sa nagkalain-laing shooting clubs lukop nasud ang mosalmot sa 3rd District Collectors of Customs Shootfest nga himuon karong Hunyo 19-20 diha sa CPRA Shooting Range sa Pusok, Lapu-Lapu City.
Ang shooting competition naglatid sa upat ka bahin -- ang Standard category (high-capacity ug single stack), Open category, Revolver category ug Production category.
"Magsilbe kini nga usa ka fund-raising alang sa katukoran sa Plaza Aduana," matud pa ni Rico Mongaya, ang Customs police ug shootfest coordinator atol sa press conference kagahapon.
Mitambong sab sa maong kalihukansi Cebu Customs District Collector Ronnie Silvestre, Executive Director Visayas International Defensive Pistol Association Jerome Lim ug CPRA head Frank Hortfilla.
Dose na ka gun clubs ang mipadayag sa ilang partisipasyon ning duha ka adlaw nga kompetisyon.
Kini naglakip sa Kamagong Gun Club, Casey Gun Club, Aqua Gun Club, NS Gun Club, Philippine National Police (PNP), C.E.B.U, Bureau of Customs (BOC) Davao, BOC Manila, Aviation Security Group, Cebu Pistol and Riffle Assn. (CPRA) Shooters, Cebu Customs United Personeros Association ug ang Media.
Mga tropeyo ang madawat sa top three winners. May mga gift items sab ang bolahon atol sa awarding ceremony.
Alang niadtong interesadong mosalmot, aduna kini registration fee nga P600 alang sa civilians ug customs shooters ug P400 alang sa mga PNP ug junior shooters. – BANAT NEWS