Runners nagpanikad na sa "Run for Q"

CEBU, Philippines - Kapin na sa 700 ka mga runners ang nagpalista aron mosalmot sa labing unang lumba alang sa mga call center agents nga uloha'g "Run for Q" karong Domingo sa buntag diha sa The Terraces sa Ayala Center-Cebu.

Ang lumba kabahin sa pagsaulog sa ikaupat nga anibersaryo sa Qualfon.

Bukas ngadto sa mga call center agents ug mga professional runners, ang lumba gibahin ngadto sa 16K open, 10K open, 10K media, 5K Open ug 5K call center agents ug 3K fun run.

Ang HR officer sa Qualfon nga si Aezel Aguirre nagkanayon nga gimugna ang maong lumba aron mahatagan og kahigayonan ang mga call center agents nga mapalambo ang ilang kapiskay sa panglawas.

Gumikan kay mao kini ang bugtong lumba sa Domingo, gipaabot nga mag-abot ang mga tang-ang runners sama ni Kenyan missionary Simon Losiaboi, Mendel Lopez, Elmer Bartolo, Mary Grace delos Santos, Madelyn Carter ug Mary Joy Tabal nga mag-ilog sa titulo sa tagsa-tagsa nila ka dibisyon.

Si race director Joel Baring, miingon nga nagpadayon gihapon ang ilang registration hangtod sa adlaw'ng Biyernes. Mahimong magparehistro diha sa Cebu City Sports Center, Qualfon nga nahimutang sa 9th floor sa Skyrise 3 building sa Asiatown IT Park, Runnr sa Ayala ug sa Citigym sa Waterfront Hotel.

Ang registration fee nagkantidad og P200 libre na ang singlet, race number ug snacks.

Ganting salapi ang madawat sa top three finishers sa matag dibisyon, samtang ang 4th-10th placers makadawat og medalya ug freebies gikan sa PLDT. – BANAT NEWS