CEBU, Philippines - Mirehistro og bag-ong rekord si Lindley Fran Navaja sa 100m event atol sa Milo National Open Track and Field Championship kagahapon didto sa Rizal Memorial Sports Complex.
Si Navaja, ang kinakusgang atleta sa Commission on Higher Education (CHED) National Game nihimo’g kasaysayan human mi-oras og 10.3 segundos ug iyang nabuak ang karaang rekord nga 10.6 segundos nga nahimo ni Julio Bayaban niadtong Disyembre 19, 1979 atol sa Marikina City National Open.
“Mao kini ang unang higayon nga nabuak nako ang rekord sa national open,” matud ni Navaja.
Si Navaja, 18-anyos, usa ka tinun-an sa kursong Electrical Engineering sa University of Cebu (UC).
Ang team Cebu City nikabkab sab og laing bulawan kortesiya ni Ernesto Ybañez sa long jump event sa gilay-on nga 6.99m
Sila si Navaja ug Ybañez uban nilang Dharl Pitogo ug Kent del Rosario mao sab ang nanghawod sa 4x100m relay sa oas nga 43.3 segundos. (BANATNEWS)