CCSC boxers andam na

CEBU, Philippines - Usa sa labing lig-on nga amateur boxing stable sa Sugbu -- ang Cebu City Sports Center (CCSC) stable, mopasabong na usab sa ilang mga boksidor sa "Paboksing sa Barangay" karong Hunyo 2 diha sa Rama Compound sa Brgy. Basak San Nicolas, ning siyudad.

Pangulohan ni kanhi Olympian ug Asian Games gold medalist Efren Tabanas, ang CCSC stable mopa-away og 12 nila ka amateur prospects sa timbang gikan 20 kgs. ngadto sa 59 kgs. divisions. Batukan nila ang mga boksidor gikan sa nagkadaiyang stable dinhi sa Sugbu.

Sa pagka karon padayon ang way puas nga training sa mga boksidor sa CCSC sa tuyo nga ila na pud nga maharos ang laing hugna sa usa sa labing dakung amateur boxing tournaments sa Sugbu nga gipasiugdahan sa Cebu City Sports Commission.

Gipaabot sab mosalmot ang mga boksidor gikan sa Sanai stable ug Omega stable sa Mandaue City, Sta. Cruz stable sa Talisay City ug Rex 'Wakee' Salud stable.

Mga boksidor sa CCSC nga moladlad sa ilang abilidad mao ang managsuong Ian ug Allan Refuella nga moaway ubos sa 51 kgs. class, samtang sila si Jay-R Barroma ug Junriel Jimenez molugwa ubos sa 42 kgs. ug 48 kgs. divisions.

Mokompleto sa komposisyon sa CCSC stable mao sila si Jeffrey Jimenez (20 kgs.), Jold Ian Depalco (25 kgs.), Anthony Loral (45 kgs.), Nick Bacalso (54 kgs.), Raymund Empic (52 kgs.), Mabel Zorro (54 kgs.), Ramjess Colina (54 kgs.), Rodex Piala (56 kgs.) ug James Castil (58 kgs.). – BANAT NEWS