Alaska batok Kings sa Cebu Coliseum

CEBU, Philippines - Walay laing tinguha si coach Tim Cone ug ang iyang Alaska Aces kun dili   ang pagkulit og laing daog batok sa Ginebra Gin Kings karong adlawa sa ilang provincial game nga uloha'g   “PBA Duwa sa Sugbo” diha sa Cebu Coliseum.

Ang duwa gikatakdang sugdan sa alas-5 sa hapon.

“This is a huge game for us.” matud ni Cone. "The Gin Kings are hot. They have a 9-0 record in an out-of-town games so far and we hope to end that streak tonight right here before the Cebuano crowd,” dugang ni Cone.

Inkaso mapilde ang Aces, si coach Cone miingonnga ngitngit kaayo ang ilang kahigayonan nga makakuha sa top two spots tungod kay moduwa pa sila sa Derby Aces Llamados sunod semana.

Ang Aces ug Gin Kings nalambigit sa three-way tie uban sa Llamados sa managsamang 6-4 win-loss records. Hugot karon silang mag-ilog sa top two spots nga kasamtangang gihuptan sa Talk N Text Tropang Texters ug sa San Miguel Beermen.

Sa laing bahin, si Cone nahimuot pag-ayong nagtan-aw sa 43 ka mga bata, kinsa nikompleto sa ilang duha ka semana nga Alaska Power Camp basketball clinic kagahapon ug iyang gipasalamatan ang mga ginikanan sa ilang pagpasalmot sa ilang kabataan aron makat-on og basic fundamentals sa basketball.

Matud pa ni coach Cone nga ang Alaska organization mipaluyo sa proyekto ni Roel Gomez ug sa laing Alaska Power Camp sa Manila nga gidumala ni Jojo Lastimosa nga tapuson karong adlawa.

Ang Alaska basketball clinic mahinungdanon kaayo alang sa mga bata tungod kay importante kaayo nga mosugod og duwa samtang bata pa.

Ang PBA dinhi sa Sugbu gidala dinhi pinaagi sa Metro Cebu Uptown Jaycees pinangulohan sa ilang presidente nga si Carlos Porras Jr. nga kabahin sa kasaulogan sa ilang ika-25 nga anibersaryo.

Ang overall chairman sa maong promotion mao si JCI senator Dr. Boy Te.

Usa kini ka fund-raising project diin tipik sa ilang matigum nga pundo ilang ihatag ngadto sa Jesus S. Avila Foundation, Inc. nga maoy ilang beneficiary.

 Mohatag sab sila’g lima ka wheelchairs ngadto sa mga tawo nga adunay kakulian sa panglawas.  – BANAT NEWS