Takayama misaad og world title

CEBU, Philippines - Usa siya ka Japanese boxer, apan desidido si kanhi two-time world champion Katsunari Takayama nga mohatag og world title alang sa Sugbu nga giila niya karon nga ikaduhang pinuy-anan.

Bisan sa wala damhang pagkadiskaril sa iyang away sa main event sa ”Best of Boxing 1” ugmang adlawa didto sa Mandaue City Cultural and Sports Complex, si Takayama mipasalig nga may adlaw ra nga makasaksi ang mga Sugbuanon sa iyang away dinhi sa Sugbu. 

Ang kanhi WBA ug WBC minimumweight champion nga si Takayama, ang labing unang international boxer nga mipirma'g  kontrata uban sa ALA Promotions, nagkanayon nga wala siya'y laing tumong kun dili mao ang mamahimong world champion ug iya kining ipahinungod sa Sugbu.

Sa press conference kagahapon sa The Nook sa Cebu City Sports Club, ang manedyer ni Takayama nga si Ken Matsumoto mipahungaw sa ilang kasubo sa nahitabong pagkapapas sa away ni Takayama human makasugat og insidente human ma-slide dihang nag-jogging kini duol gyud sa ALA Boxing Gym sa Talamban.

Mapasalamaton hinuon si   Matsumoto ngadto ni ALA Promotions president Michael Aldeguer, Dennis Cañete ug Chad Cañares, kay bisa'g   wala madayon ang tune-up fight, nakahatag kini'g dakung kalamboan sa abilidad sa iyang boksidor human kini nag-training sa ALA Gym uban sa mga dekalibreng ALA boxers.

Matud ni Matsumoto nga hayag nga kaugmaon ang nagpaabot ni Takayama sa pagpirma niini'g usa ka tuig nga kontrata sa ALA Promotions ubos sa liderato ni Aldeguer. Si Aldeguer misaad nga hatagan niya si Takayama og oportunidad nga mo-away sa lain-laing dapit sa kalibutan.

Si Takayama gikatakda untang makigharong ni Jayson Rotoni sa Metro Manila karong Sabado, apan tungod sa iyang injury, si Matsumoto mihukom nga moderitso na lang sa IBF eliminator batok sa South African nga Tshepo Lefele karong Agosto 27 didto sa South Africa. – BANAT NEWS