Bonggang premyo sa 1st Eagle Run

CEBU, Philippines - Gumikan sa mga hangyo gikan sa mga fun runners, ang organizers sa 1st Eagle Run midesider nga ilakip ang 3K category ug dagkung mga premyo karong Domingo diha sa Cebu Doctors' University (CDU) campus sa Mandaue City.

Gumikan niini, ang lumba nga gipasiugdahan sa Sacred Heart School Boys (SHS) Batch 1985, aduna nay tulo ka kategoriya -- 10K ug 5K Open ug 3K.

Ang top three winners sa 10K category makadawat og P6,000, P5,000 ug P4,000 matag usa. Ang fourth ug fifth makaangkon og P1,000 ug P750.

Ang sixth hangtod sa 10th finishers hatagan og P500 gift certificates.

Ang top 10 winners makadawat sab og mga medalya ug certificate kortesiya sa Basic Graphics.

Usa ka customized medals ang itunol sab ngadto sa top 10 winners sa SHS-B alumni.

Ganting salapi ang ihatag ngadto sa mga mananaog sa 5K ug 3K races.

Ang organizers nga gipangulohan ni Dr. Yong Larrazabal ug Joel Baring   mohatag sab og special awards ngadto sa youngest ug oldest runner, best in costume, most attractive female runner ug most handsome runner.

Ang CDU Dance Troupe modalit sab og pasundayag atol sa awarding ug raffle draw.

Mga premyo nga madaog mao ang Kenneth Cobonpue Yoda EC chair, 70 Eagle Run basketballs, Island Souvenir t-shirts, Nike Athletic Club GCs, Robinson's GCs, grocery items gikan sa Profoods, sim cards ug City Gym GCs.  – BANAT NEWS