Ateneo hari sa 3-on-3 Summer League

CEBU, Philippines - Ang Sacred Heart School-Ateneo de Cebu (kanhi Sacred Heart School) Team A mao ang kampiyon sa duha ka dibisyon sa 3-on-3 Summer League diha sa Banilad Town Centre (BTC).

Ubos sa giya sa ilang coach Jet Cabellon, ang SHS-A cagers mipukan sa tagsa-tagsa nila ka mga kaatbang sa 10-under ug 12- under divisions.

Ang MVP nga si Patrick Wilson Yu maoy nangulo sa 10-under team human nila gipukan ang ilang igsuong koponan SHS- B sa best-of-three finals.

Ang 11-anyos nga si Anton Nino Araw-araw mao usab ang mitimon sa 12-under division sa ilang sangka batok sa University of San Carlos (USC)-North, 2-1.

Naglabaw og sayes puntos ang USC-N sa katapusang 10 minutos sa duwa, apan ang tandem nila ni Araw-araw ug Angelo Gabriel Pioquinto mipasulod sa ilang perimeter shots nga maoy nakapalingkawas sa SHS-A sa iskor nga 9-8.

Usa ka upset usab ang gihimo sa DBTC Greywolves human nila giharos ang top-seeded USC-Golden Warriors, 2-0.

Ang forward nga si Joshua Miel Castro mao ang gibayaw nga MVP sa 14-under category.

Sa 16-under, duha ka Carolinian teams ang nag-abot sa finals, diin ang USC White mipakaging sa USC Gold, 2-1. Sikit kaayo ang sangka sa duha ka koponan nga miresulta sa overtime, apan ang point guard nga si Justin Jaca mipatusak og usa ka jumper nga maoy mihatod sa daog 14-13.   (BANATNEWS)