CEBU, Philippines - Gikan sa ilang pagpangharus sa East, ang no. 2 seed Orlando Magic kinsa adunay hapsay nga 8-0 record sa playoffs, mo-host karong adlawa batok sa no. 4 seed Boston Celtics alang sa Game 1 sa East Finals didto sa Amway Area sa Orlando, Florida.
Daan nag gipangandaman ni coach Stan Van Gundy ang Celtics human niya makita gi-unsa pagpalagpot sa Celtics ang no. 1 team Cleveland Cavaliers sa miaging tuig ug gitan-aw na sab nila ang tape sa 2008 finals dihang gisakmit sa Celtics ang korona human sila modaug batok sa Los Angeles Lakers.
Lakip sa mga naandan nga talan-awon nga gitutokan ni Van Gundy ug sa Magic mao ang kanunay paghapak-hapak ni Kevin Garnett sa iyang dughan matag higayon nga adunay maanindot nga play ang Celtics, ang mga tirada gikan sa three-point area ni Ray Allen ug ang pagsuntok-suntok ni Paul Pierce sa hangin.
Madugangan karon ang ilang trabaho tungod kay gawas sa Big three, naa na si Rajon Rondo nga makahatag og dugang labad sa ulo. Si Rondo mao'y karo’y assists leader sa NBA sa iyang 9.8 assist matag duwa samtang si Jameer Nelson sa Magic aduna’y 5.4 assists.
Si Pierce ug si Dwight Howard nagtabla sa ilang comparison nga aduna’y 18.3 puntos matag duwa apan si Howard maoy naglabaw sa rebounds sa 13.2 rebounds kung itandi ni Kendrick Perkins sa Celtics nga may 7.6 rebounds.
Sa miaging tuig, parehong wala sa playoffs sila si Garnett ug Nelson—si Garnett may piang sa iyang tuong tuhod ug si Nelson may piang sa iyang tuong abaga. Karon, pareho na silang moduwa sa ilang tagsa-tagsa ka teams.
Ang Magic mitapos sa regular season isip no. 2 seed sa ilang 59-23 nga baraha samtang ang Celtics maoy no. 4 sa ilang 50-32 nga baraha.
Laing alas alang sa Magic mao sila si Vince Carter ug Rashard Lewis nga daku’g ikatabang sa ilang kampanya human mapakyas sa miaging tuig batok sa Lakers. - GGM gikan sa NBA.com (BANAT NEWS)