CEBU, Philippines - Nagmangtas ang mga koponan gikan sa Ateneo de Cebu (kanhi Sacred Heart School) ug sa University of San Carlos (USC) sa ikatulong adlaw sa 3-on-3 Summer League kagahapon didto sa Banilad Town Centre.
Ang Ateneo Team-A midemolis sa Philippine Christian Gospel School (PCGS), 10-2 sa 10-under ug gipilde sab nila ang PAREF-Springdale, 6-5 sa pagpangulo ni Charles Denzel Sy aron ituboy ang ilang koponan sa kinatumyan sa liderato uban ang 4-1 nga baraha.
Sa 12-under, ang Ateneo Team A midemolis sab sa PAREF Springdale, 12-4 ug sa PCGS sa iskor nga 13-8.
Sa laing bahin, ang USC North maoy nakasinati og kulbahinam nga kadaugan dihang si Noriko Benedicto mipasud sa iyang mahinungdanong itsa dungan sa pagtingog sa buzzer nga nakaluwas sa iyang koponan, 12-11 batok sa PCGS ug nagsawo karon sa liderato uban sa Ateneo A sa ilang 5-1 win-loss records.
Sa 14-under category, ang USC Gold ug ang Don Bosco Technology Center (DBTC) Greywolves mipukan sa tagsa-tagsa nila ka kaatbang aron sab magsawo sa liderato sa ilang 7-0 nga baraha.
Sila si Arnie Christian Padilla ug Clint Suelto mi-iskor og sayes puntos matag usa alang sa USC Gold, kinsa mipukan sa Cebu Eastern College (CEC) Team A, 9-5 ug Team C, 9-5. (BANATNEWS)