CEBU, Philippines - Kapugngan pang baha nungka ang pormal nga pagbukas sa gikahinaman nga 4th Lapu-Lapu Basketball Association (LLBA) basketball tournament nga uloha'g "LLBA Rollway Cup" karong adlawa diha sa Agus gym sa dakbayan sa Lapu-Lapu.Dose ka koponan ang mopakita'g aksiyon ug magtigi sa korona ug dungog ning tinuig nga liga nga gipaluyohan sab sa Rollway Customs Brokerage ni Rolly dela Pieza.
Mobukas sa maong kalihukan mao ang motorkada sa mga partisipanteng koponan nga sugdan sa ala-1 sa hapon. Adto kini manukad sa Villas Magallanes sa Sta. Lucia Property ug moagi sa Pusok, Mactan ug lahos na sa Agus gym diin adto himoa ang hamubong programa.
Molamas sa programa mao ang paghagpat og "best muse."
Mga partisipanteng koponan naglakip sa Ave Maria Sanctuary Park, AJY Bong, Verlex, RoRo Transport, Yan C Rico, Ace Penzionne, Sol Meat, John Videoke, VKK Divers, RN-Puyat Steel, Tango ug ang All Box Packaging.
Moduwa kini og single round-robin format sa elimination diin ang top 2 teams makaangkon og "twice-to-beat" advantage sa semifinals. Ang modaog maoy mag-abot sa tinaktakay nga kampiyonato.
Lain pang nagpaluyo sa LLBA Rollway Cup 2010 mao si Jun Tan ug Lapu-Lapu City Sports Commissioner Harry Radaza.
Ubos sa liderato sa ilang presidente Alan Sepe, ang ubang opisyales sa LLBA mao sila si Archie Ompad (vice president), Ely Gomoz (treasurer) ug Eldi Daluz (auditor). Ang advisers naglakip nila ni Agus Brgy. Councilor Jimboy Igot, Dr. Michael Ouano, Dr. Ryan Ceniza, Eddie Bontis ug Jerry Augusto.
Si Alan Yu maoy milingkod isip commissioner, samtang si Billy Nadado maoy organizer. (BANATNEWS)