Encarnacion nangu sa mga finalists

CEBU, Philippines - Wala magpabangbang si Christopher Encarnacion diin siya maoy nangulo sa laing tulo ka Sugbuanong tennis players, kinsa miabante sa national finals human manghawod sa ilang tagsa-tagsa ka dibisyon sa Visayas leg sa 2010 Milo Junior Tennis Cup kagahapon didto sa Cebu Country Club (CCC) tennis court.

Uban ni Encarnacion nga mipanon sa grand finale mao si defending unisex 10-under champion Arthur Craig Pantino, Ralph Juliane ug Crissiane Issa Kintanar uban sa bisitang Alexie Santos sa Palawan.

Naangkon ni Encarnacion ang 12-under title nga wala niya makuha sa miaging tuig human gipilde si Jan Godfrey Seno, 6-2, 6-0.

Sa laing bahin, si Pantino sa University of San Carlos-South, yano kaayong nakadepensa sa iyang trono pinaagi sa pagkulit og 6-0, 6-3 nga kadaugan batok ni Gener Francis Lambayan.

Si Juliane nangayo pa'g tulo ka set sa wala pa niya maangkon sa hingpit ang kadaugan batok ni Adrian Parangan sa boys' 14-under final, 3-6, 6-3, 10-1. Si Kintanar miugbok ni Clarissa Mae Fuentes, 6-1, 6-1 nga maoy ikaupat nga Sugbuanon nga manulong ngadto sa Clark karong Agosto batok sa laing lig-ong players sa nagkalain-laing rehiyon.

Sa iyang bahin, si Santos midemolis ni Zethley Mae Alfrez, 6-0, 6-0.

Sa special events, si Sally Mae Siso mihimo'g double victory human manghawod sa girls 16-under ug girls 18.

Si Sally Mae mipukan ni Kintanar sa girls 16-under final, 6-2, 6-2. Dayon iyang gipilde si Hannah Espinosa, 6-2, 6-2 sa girls 18 final.

Si Fritz Satera maoy mikompleto sa mga mananaog human gibuntog si Francis Parangan, 6-0, 6-2 aron pagdaog sa boys 16-under title. (BANATNEWS)