Fair Trade Run gitakda Mayo 23
CEBU, Philippines - Agi’g pagsaulog sa World Trade Fair Week, ang Fair Trade Cebu molusad sa labing unang Fair Trade “Run for a Cause” karong Mayo 23 diha sa Asiatown I.T Park sa Brgy. Lahug, ning siyudad.
Gibahin sa tulo ka dibisyon -- 10K Open, 5K ug 3K, ang lumba maoy kick-off event sa kasaulogan sa World Fair Trade Week nga salmotan sa businessmen, environmentalist, women groups ug youth volunteers.
Ning pagsulat, may 500 na ka runners ang nakaparehistro, katunga sa gilauman sa organizers nga 1,000 runners.
Gawas sa mga top ug fun runners, masentro sa maong kalihukan mao ang sikat nga artista ug environmentalist nga si Chinchin Gutierrez, kinsa gilauman nga modagan.
Ganting salapi ug mga medalya ang nagpaabot sa mga mananaog.
Sa P250 nga registration fee, ang matag partisipante makadawat og libreng t-shirt, race number, route ug snacks.
Ang deadline sa registration hangtod lang karong Sabado diha sa The Fair Trade Shop Cebu sa Fuente Osmeña Blvd., Collettes Buko Pie sa SM City-Cebu ug sa Cebu City Sports Center. – BANAT NEWS
- Latest
- Trending
