Dela Torre putos sa bun-og
CEBU, Philippines - Naputos sa bun-og ug gisi ang nawong sa beteranong si Demetrio 'The Standard' dela Torre human kulataha ni Johnrex 'Durex Dragon' Torbiso sa ilang sangka sa Universal Reality Combat Championship (URCC) – Carnage niadtong miaging gabii didto sa South Road Properties (SRP).
Nagpasulabi ang kahanas sa ground fighting ni Torbiso, kinsa mipakita dayon og maayong labok sa iyang debut match batok sa kanhi RP champion nga si dela Torre.
Kumo'g siko ang gipatama ni Torbiso ngadto sa ulo ug lawas ni dela Torre kinsa, naluya'g panagang sa nanghinapos nga minutos sa round 1.
Hingpit nga gitapos ni Torbiso ang away pinaagi sa iyang makabungog nga patid, ug dayon ang hait nga hook nga miabli og dakung gisi sa agtang ni dela Torre.
Tungod sa way hunong nga pag-agas sa dugo, gihunong sa referee ug sa ring side physician ang away sa oras nga 1:23 sa ikaduhang round.
Sa main event, wala kaporma ang Sugbuanong si Jerome Torbiso human siya gipaundang sa Amerikanong si George Flaustbaums sa oras nga 3:41 sa unang round.
Si Torbiso wala na ka-ikyas human siya maangklahi ni Flaustbaums, kinsa mihimo'g guillotine choke nga maoy nakapugos sa Sugbuanon nga mo-tap out.
Ang Mixed Martial Arts (MMA) double-header gipasiugdahan sa DEFTAC Cebu ubos sa liderato ni Renault Lao uban sa suporta sa kagamhanan sa siyudad sa Sugbu. (BANATNEWS)
- Latest
- Trending
