Eskrima sa Australia ug uban pa'ng lega

CEBU, Phillipines - Bag-ohay lang mi-abot gikan sa ilang usa ka semanang eskrima seminar didto sa Adelaide, Australia ang 90-anyos nga Supreme Grand Master sa Doce Pares World Eskrima Federation nga si Ciriaco “Cacoy” Cañete ug tuyo nilang duha sa iyang anak nga si Dennis nga mopauli sa dili pa ang piniliay aron makabotar sa ilang nagusto-an nga kandidato karong adlawa sa makasaysayanong first automated election sa atong nasud.

Mag-ampo kita nga dili unta mapalpak ang piniliay aron kalikayan ang posibleng kagubot.

Gisugdan ang seminar kaniadtong Abril 30 ug natapos kaniadtong Mayo 8. Didto kini ipahigayon sa Dom Kopernika Polish Center sa Anthol Park ug gipahiluna sila sa maong dapit ni GM Chris Nasilowski, ang tag-iya sa Millenium School of Martial arts.

Sila si Cacoy ug Dennis gi-abagan sa paghimo sa maong seminar sa GM Vince Palumbo, ang usa sa labing suod nga tinun-an ni Cacoy didto sa Australia ug head instructor sa International Combative Martial Arts Academy (ICMAA).

Makabungog nga pagsugat ang gipakita sa mga Australyanong mahiligon sa martial arts ug natagbaw sila sa usa ka semanang seminar didto.

Gitudloan sila sa mga pipila ka pamaagi sa stick disarming, stick trapping ug hand locking ug uban pang mga estelo nga gimugna ni Cacoy.

* * *

Bag-o lang gisugdan ang Guadalupe Athletic Association (GAA) Founder’s Cup nga gisalmotan og 13 ka teams lakip ang Pure Serv nga gipanag-iya sa ba-ong presidente sa GAA nga si Raul Sollano.

Matod pa ni Sollano nga mao sa’y tag-iya sa Evan Aulga Hardware diha sa Banawa, higpit niyang ipatuman ang “no pay-no play” policy diha sa GAA ug hingusgan sab ang pagkolekta sa monthly dues aron aduna sila'y magamit nga pundo alang unya sa umaabot nga mga proyekto.

Si Sollano maoy mipuli kang Boy Te isip bag-ong presidente ug tungod kay silang tanan mahiligon man sa basketball, ilang paluyohan si Sollano sa iyang mga plano.

* * *

Natapos na gyud ang Bureau of Customs 1st Port of Cebu Sportsfest nga gisugdan kaniadtong Pebrero 12 ug natapos kaniadto lang Mayo 4 ug ang kataposang event mao ang volleyball diin nahimong kampiyon ang MDJL Brokers batok sa Cebu-Customs United Personeros Association (C-CUPA) ubos ni Yoli Cena sa usa ka kulba-hinam nga duwa nga milanat og five sets.

Mao lang sab kadto’y unang daog sa MJDL sa tulo nila ka panagbagat sa volleyball sa Sportsfest apan nakabawos sab ang CCUPA kay sila man maoy kampiyon sa bowling.

Sa basketball, ang Mactan Hotmen ni Collector Bingo Matugas maoy kampiyon, sa chess si Allan Nepomuceno ug sa golf si Ding Abay-abay kinsa mipukan kanilang District Collector Ronnie Silvestre ug Rady Abarintos.

Sunod nilang ipahigayon mao ang Customs Employees and Brokers Union (CEBU) basketball tournament ug sabotan pa ang tukmang petsa. Daghan pa kaayong mga lega nga gisundan sa SPORTSgab ug usa na niini ang malamposon nga pagtapos sa San Isidro, Talisay SK summer basketball tournament nga gipasigudahan sa ilang SK chairwoman nga si Charlene dela Cuesta ug San Isidro Basketball Association (SIBA) president Kenneth Maningo, usa sa mga point guards sa Hotmen.

Miscellaneous. Today is election day. This is history for the country being this is the first automated election. Good luck to all candidates—national or local and may the best bet wins.Serve the country well and serve your people well so that our votes are not wasted. To all mothers, you had your day yesterday and ours will follow next month. Welcome to the Christian World Baby Renz Karl P. Narvasa who was baptised yesterday at the San Roque Parish in Mambaling. My friend Roy Canillas is extending his kindness and helpfulness to his friends and relatives from Gingoog City by way of bringing to Cebu top athletes from his hometown—one badminton player Dan Axel Ocampo and one basketball player EJboy Cañosa. – BANAT NEWS