CEBU, Philippines - Gimakmak ni Jan Godfrey Seno si Vudie Carl Balondo, 6-1, 6-0 aron pag-abante ngadto sa quarterfinal round sa boys 12-under sa 15th Gullas Cup tennis tournament kagahapon didto sa Cebu Country Club tennis courts.
Miposte sab og impresibong kadaugan si Christopher Encarnacion batok ni Norman Joseph Enriquez, 6-0, 6-2.
Laing lima ang mipalandong sa quarterfinals ug kini naglakip ni Jeff Balatero, King Paler, Joshua Kinaadman, Clyde Dujale ug Francis Lambayan human midaog batok sa tagsa-tagsa nila ka kaatbang.
Si Balatero mipahilom ni John Mark Abad, 6-1, 6-0, si Paler milampurnas ni Von Cubcub, 6-0, 6-1, si Kinaadman mipalagpot ni Ashton Repunte, 6-1, 6-2 ug si Lambayan mitikdol ni Clyde Laquio, 7-5, 6-2.
Sa boys 16-under, sila si Ivan Casinillo, Leomar Sarvida, Troy Pintor, Louie Mark Vincent Pestaño ug Joshua David Bendoy ang miabante sa round of 16.
Gipukan ni Casinillo si Reynaldo Dimao, 6-0, 6-3, samtang si Sarvida mipilde ni Rex John Sabela, 6-1, 6-1. Si Pintor nakalahutay sa makutas nga duwa batok ni Joel de la Torre, 6-3, 6-1, 10-7, si Pestaño midaog batok ni Eldan Magallanes, 6-4, 6-3 ug si Bendoy mipatigbabaw batok ni Puyn Honoridez, 6-0, 6-1.
Sa laing bahin, ang mga duwa sa girls division sugdan karon diha gihapon sa CCC tennis courts.
Dul-an sa 140 ka entrante ang misalmot sa labing dakung age-group tennis competition sa southern Philippines.
Ang Gullas Cup usa ka group 2 event ubos sa Philippine Lawn Tennis Association (PHILTA). – BANAT NEWS