CEBU, Philippines - Mag-unayay ang San Roque Football Club (SRFC) sa kampiyonato sa under-10 division sa 10th National Inter-Club Football Tournament nga gipasiugdahan sa Cebu Amateur Football Club karong alas-4 sa hapon diha sa Paref-Springdale field.
Ang SRFC-A makigharong sa ilang igsuong koponan SRFC-B human ang duha mipakita'g impresibong labok sa semifinal kagahapon.
Ang SRFC-A milatos sa M. Lhuillier, 5-1, samtang ang SRFC-B midumbol sa Paref-Springdale, 4-1.
Sa dili pa ang ilang sangka, ang M. Lhuillier ug Springdale mag-ilog pa alang sa ikatulong dapit sa alas-8 sa buntag, sundan kini sa laing duwa alang sa ikatulong dapit sa boys 12-under division.
Sa laing duwa kagahapon, ang 17-under defending champion Abellana National School (ANS)-Pomeroy milampurnas sa Don Bosco Technology Center, 3-1 didto sa University of San Carlos-Technological Center field.
Ang bisitang Sta. Rita booters walay hunong nga mipakita og maayong labok sa under-17 category aron pagpukan sa Paref-Springdale, 3-1.
Ang ANS-Pomeroy moharong sunod batok sa Sacred Heart School-Ateneo de Cebu, samtang ang Sta. Rita makigtigi sa DBTC. Ang mga mananaog maoy mag-ilog sa korona. – BANAT NEWS