PSN fund-raising run sisikad sa Mayo 15
MANILA, Philippines - Magdaraos ang Operation Damayan, ang humanitarian arm ng STAR Group of Publications, ng isang fund-raising run na tinawag na “Pilipino Star NGAYON Fun Run for a Cause” sa Mayo 15 sa SM Mall of Asia grounds sa Pasay City.
Ang event, nakatakda sa ganap na alas-5 ng umaga, ay isasagawa upang makatulong sa Adopt-A-School project via “Bigay Todo sa Pagtakbo” kung saan ang malilikom na pondo ay mapupunta sa pagpapagawa ng San Isidro Elementary School sa Naguilian, La Union, isa sa mga eskuwelahang lubhang naapektuhan ng bagyong si “Pepeng” noong nakaraang taon.
Ang mga events na nakalatag ay ang 3k, 5k at 10k. Ang entry fee ay P350 (3k at 5k) at P400 (10k), kasama na ang limited edition na Pilipino Star NGAYON run singlet at race bib na may timing chips at donasyon sa Operation Damayan.
Ang pagpapalista ay kasalukuyang nagaganap sa R.O.X. Bonifacio High Street, Chris Sports outlets sa SM MOA, SM North Edsa, SM Megamall at SM Sucat. Ang onsite registration ay makikita sa SM Mall of Asia grounds sa Mayo 1 at 2 mula alas-6:30 hanggang alas-9 ng umaga.
Maaari ring magpatala ang mga partisipante via online sa www.runningmate.ph/psngayon. Ang deadline ay nakatakda sa Mayo 12.
Mga cash prizes at gift packs ang matatanggap ng mga top finishers sa fun run na suportado ng Globe, SM Mall of Asia, San Mig Coffee, Diamond Hotel, Pan Pacific, The Real Bank, Microtel, R.O.X., Chris Sports, Top Nine, Premier at media partners The Philippine STAR, PM, Freeman at Banat.
- Latest
- Trending
