Baby Lancers 'sakmit titulo sa Partner's Cup

CEBU, Philippines - Nakabawi gikan sa ilang mga passing errors ang PTT Fuels-UV Baby Lancers sa second period ug kalit kining nagmangtas sa final period aron pagbuntog sa Enervon C-UC Junior Webmasters, 90-85 ug ingon man pagsakmit sa secondary title sa 4th CESAFI Partner's Cup niadtong Miyerkules sa gabii didto sa Dumanjug Sports Complex sa habagatang bahin sa Sugbu.

 Ang nagsunod-sunod nga passing errors nga nahimo sa Baby Lancers maoy nakaingon nga gibiyaan sila og 10 puntos, 38-28 sa second period.

Apan daling nakarekober ang Baby Lancers pinaagi sa pagpabuhagay og 12-2 nga rally aron tablahon ang duwa, 40-all, sa nahabiling 1:42 sa dili pa ang halftime. Ang Junior Webmasters mikontrolar sa halos tibuok second half, apan ang Baby Lancers subling milusad og 14-4 run aron ilogon ang labaw, 79-75 sa katapusang 4:32 sa duwa.

Katapusang milabaw ang Junior Webmasters sa iskor nga 75-72 human sa basket ni Alvin Labolabo Jr.   

Sila si Linao ug Francisco Arong Jr. parehong mi-iskor og 16 puntos aron pangulohan ang Baby Lancers. Si Gerald Legarde miduga'g 12 puntos alang sa Baby Lancers, kinsa bag-o lang sab nakampiyon sa National Basketball Training Center (NBTC) regional finals didto sa Dumaguete City.

Si Jerie Marlon Pingoy mao sab ang nangu sa Junior Webmasters sa iyang 20 puntos.

Ang duwa nga gitukod ni kanhi mayor Cesar Baricuatro ug Julian Macoy gipaluyohan ni Sen. Manny Villar.

Mitambong sab ang Southern Island manager sa PTT Fuels nga si Fidel Aloba aron paghatag og moral support ngadto sa iyang players.   

Puntos Matag Usa

PTT Fuels-UV (90) - Linao 16, Arong 16, Legarde 12, Mendoza 9, Suan 8, Marata 6, Smith 4, Dennison 4, Undaloc 4, Flores 2, Nuñez 2

Enervon-UC (85) - Pingoy 20, Labolabo 11, Pua 6, Codilla 6, Saramosing 6, Padilla 5, Nazareno 5, Talisic 5, Aranas 4, Comendador 4, Ortega 4, Culango 4, Yubran 3. – BANAT NEWS