Cacoy, anak molarga na

CEBU, Philippines - Molarga na karong adlawa paingon sa Australia si Eskrima Grandmaster Ciriaco 'Cacoy' Cañete uban sa iyang anak nga si Dennis aron mopahigayo'g mga seminars ug demonstrations sa mga dagkung siyudad didto sa nahisgutang nasud.

Ang seminar niadto pa unta ipahigayon sa ulahing bahin sa Marso, apan gi-uswag kini ngadto sa Abril 28 hangtod na sa Mayo 7.

Ang mga Cañetes molahos didto sa Adelaide diin adto himuon ang unang seminar nga gi-organisar sa tinun-an ni Cacoy nga si Grandmaster Vince Palumbo. Sa sunod adlaw, moadto sila sa Sydney aron mopahigayon og laing seminar nga gitukod ni Master Craig Hayward ug sa katapusang adlaw sa seminar adto himuon sa Wollongong sa New South Wales diin paga-abagan sila ni Dominik Lavalle.

Mobalik sila dinhi sa Sugbu sa Mayo 8 duha ka adlaw sa dili pa ang presidential elections. – BANAT NEWS