Echavez midominar sa 2010 National Age-group Triathlon

CEBU, Philippines - Nagbunga ang training ni Lhoriz Echavez uban sa National Triathlon squad human kini nag-una sa female 20-above category sa Cebu leg sa 2010 National Age-group Triathlon (NAGT) kagahapon didto sa Plantation Bay Resort and Spa sa dakbayan sa Lapulapu.

Ang taga-Mandaue nga si Echavez mitapos sa makutas nga rota sa sprint triathlon sud sa duha ka oras, lima ka minutos ug kwatro segundos. Nagsunod ni Echavez mao sila si Janice Ann Bautista ug Katrina Jandoc sa ikaduha ug ikatulong dapit.

Sa 25-29 men’s division, migawas nga labing paspas si Elmo Clarabal human siya miabot sa finishline sa oras nga 1:45.29.

Naglawig si Ralph Arche apan kalit mibulhot si Clarabal alang sa unang dapit. Si Arche mirehistro og oras nga 1:47.45 alang sa ikaduhang dapit, samtang si Franz Baguio mipwesto sa ikatulo sa oras nga 1:50.43.

Ang RP Ironman nga si Noy Jopson mao ang midagit sa titulo sa 35-39 class, gisundan nila ni Ronald Plantar (2:01.24) ug Ruel Cola (2:09.03) isip second ug third placer.

Si Alexander Echavez, manghud ni Lhoriz, maoy midaog sa 16-19 class, samtang si Ralph Martin Seos-e midominar sa 20-24 class ug ang amerikanong si Charles Fletcher miangkon sa korona sa 50-54 division.

Ang kanhi top junior swimmer nga si John Sebastian Solon ug Ruel Binolirao mao ang midaog sa relay competition. – BANAT NEWS