Cobras wala kadut sa Jaguars

CEBU, Philippines - Mga beteranong players maoy nangu sa kadaogan sa Ave Maria Sanctuary Park-USJR Jaguars batok sa Southwestern University (SWU) Cobras sa iskor, 96-88 diin mibahug og 27 puntos si Aldrin Ocañada atol sa usa ka exhibition game sa miaging gabii didto sa barangay Bato, dakbayan sa Toledo.

Ang kanhi PBA-star ug produkto sab sa SWU nga si Jercules Tangkay mikadlit ug 23 puntos ug ang kanhi CIT Wildcat nga si Jerry Jaca midugang ug 12 puntos.

Miamot sab og otso puntos si Danny Aying ug ang labing bata sa mga re-enforcements nga si Elvis Labares sa USPF mi-iskor og sayis puntos ug si Ope Abellana mi-iskor og kuatro puntos.

Walay nahimo ang depensa sa Cobras sa pagpugong sa mga tadhan nga players sa Ave Maria nga bag-o lang sab nahimong kampiyon sa CESAFI Partner’s Cup.

Ang Ave Maria ni team owner Raffy Senining ug coach Edito Salacut misalmot sab sa nagpadayong torneyo sa Talamban.

Sila si Eleazar Armecin ug Eliud Poligrates maoy nangu sa Cobras sa ilang 19 ug 17 puntos matag usa samtang si Rene Pacquiao mihakot og 16 puntos.  – BANAT NEWS