Brokers 2-0 batok Customs

CEBU, Philippines - Mihakot na sab og daog ang Cebu-Customs United Personeros Association (C.CUPA) ni team manager Yoli Cena human gipilde ang Customs Organic All-Star, 116-102 sa exhibition game didto sa Benedicto College gym sa barangay Banilad, dakbayan sa Mandaue.

Ang Customs misikit sa katapusang higayon, 58-60 kortesiya sa undergoal ni District Collector Ronnie Silvestre sa tunga-tungang bahin sa third period. Hinuon, ang Brokers wala mag-usik og panahon ug pinaagi nilang Takloy Moral, Gelran Gelbolingo ug Amay Palad mipasud sa ilang mga tirara aron inaton og balik ang labaw, 71-60 dayon pagkontrolar sa kinatibuk-ang fourth period.

Si Moral maoy topscorer sa Brokers pinaagi sa iyang 26 puntos, si Gelbolingo mikimada'g 19 puntos, samtang sila si Palad ug Loreto Castillo miamot og 10 puntos matag usa.  

Si Jingjing Rama, miburak og 33 puntos aron pangulohan ang Customs, gisundan ni Ferdie Laraga nga adunay 21 puntos. 

Puntos Matag Usa

BROKERS (116) - Moral 26, Gelbolingo 19, Palad 10, Castillo 10, Logarta 9, Cena 8, Nadal 8, Dacumos 8, Gonzales 5, Canillas 4, Sala 3, Avenido 3, Agustinez 1

CUSTOMS (102) - Rama 33, Laraga 21, Mose 18, Manahan 11, Monteño 7, Lopez 4, Mabalo 4, Silvestre 2, Macatangay 2, Remonde 2. – BANAT NEWS