Jaguars suway kitkit daog sa 7th Shakey's V-League

CEBU, Philippines - Pagsakmit sa labing una nilang daog maoy tumong sa University of San Jose-Recoletos (USJ-R) Jaguars sa ilang pakigharong sa Ateneo Lady Eagles sa pagpadayon sa 7th Shakey's V-League karong adlawa didto sa The Arena sa San Juan City.

Ang Lady Eagles wala na mopakita'g aksiyon sukad gisugdan ang ilang kampanya uban ang 25-21, 26-24, 25-19 nga kadaugan batok sa St. Benilde niadtong Abril 11, apan mao gihapon ang inilog batok sa USJ-R ni Cebu Sports Hall of Famer coach Grace Antigua nga napilde sa unang-duha nila ka duwa sa liga.

Ang kadaugan sa Ateneo Lady Eagles mao unya ang motukmod kanila ngadto sa quarterfinals uban sa Lyceum ug Adamson University.

Sa ilang bahin, ang USJ-R maghangad sa maayong performances sa guest players Michiko Castañeda ug Michelle Simbajon uban nilang Hannah Singson, Abigail Praca, Joy Bonita ug Carla Dubduban aron mabuhi pa sa ilang paglaum nga maabante sa quarterfinals.

Ang St. Benilde nga mitak-op sa ilang kampanya sa eliminasyon uban ang 1-3 nga baraha, mao sab ang laing team nga mosuway'g langkat sa ikaupat ug katapusang lingkoranan sa quarterfinal sa Group-B.

Sa laing bahin, gipaabot nga kulbahinam nga aksiyon ang moulbo sa duwa tali sa San Sebastian ug UST sa alas-4 sa hapon diin ang Lady Stags nagtinguhang moharos sa eliminasyon sa Group-A.