Team Mandaue kampiyon sa ilang balwarte

CEBU, Philippines - Naghari ang Team Mandaue sa kaugalingon nilang balwarte dihang ilang gipukan ang University of San Jose Recoletos-Ave Maria, 86-71, sa championship sa 3rd Mayor Jonas Cortes Invitational-Friendship niadtong miaging gabii didto sa Mandaue Sports and Cultural Complex.

Aron likayan ang usa ka upset, gipabuthan dayun sa Mandaue ang Jaguars sa pagpangulo ni James Laygo ug Cris Deputado aron hatagan og 10 puntos nga labaw ang Mandaue, 21-11 sa first period.

Gikan sa 10 puntos, gidoble pa sa Mandaue ang labaw sa second half, human mikiat sila si Fiel Mercader,Ritchum Denison ug Laygo nga mipauwan og upat triples aron inaton ang labaw, 57-37, paingun ngadto sa final period.

Gisuwayan pagsalbar ni Anecito Lapiz ang Jaguars pinaagi sa pagpatusak og tulo ka tres sa katapusang 3:02 sa duwa, 77-63, apan dili igo iyang paningkamot aron papason ang dakung labaw sa Team Mandaue.

Si Laygo mao ang leading scorer alang sa Mandaue sa iyang 21 puntos, samtang si Frangiel Omolon midunol og nuybe puntos ug sila si Denison, Juven Cortes ug Elvis Labares miamot og otso puntos matag usa.

Ang samaran nga Jaguar gipangulohan ni Lapiz nga mitira og 20 puntos, giabagan nila ni Jan Malinao ug Christian Senining nga miiskor og nuybe ug utso puntos matag usa .

Sa laing bahin, giusban sa Southwestern University (SWU) Cobras ang nanulong nga Letran Knights, 67-56, aron masakmit ang ikatulong luna sa torneyo.  

Napiangan ang Letran human ma-injured ang duha nila ka sinaligang point-guard nga sila si Franz Dysam ug Kevin Alas kinsa nadakin-as atol sa third period.

Si Elliud Poligrates maoy bayani sa Cobras dihang miposa kini og 29 puntos, samtang ang forward nga si Jam Cortes mao ang nangulo sa Knights sa iyang 11 puntos.  – BANAT NEWS