Losiaboi nag-una sa 2nd Great Lapu-lapu Run

CEBU, Philippines - Bisan paman og gihamuk siya og injury ug isyu sa iyang visa, mipatigbabaw gihapon ang Kenyan Missionary nga si Simon Losiaboi kinsa misakmit sa titulo sa 2nd Great Lapu-lapu Run 2 kagahapon didto sa Liberty Shrine sa Mactan.

Giapsan ni Losiaboi ang pambato sa Negros Occidental nga si Eric Panique, human niya gilabang ang finish line sulod sa usa ka oras ug 47 minutos alang sa kampiyonato sa 21k men’s open. Si Panique kinsa maoy second placer mitapos sa lumba sulod sa 1:13.24.

Ang garbo sa Sugbu nga si Mendel Lopez mipahiluna sa ikatulong dapit sa iyang oras nga 1:14.54, samtang si Elmer Bartolo ug Alvirg Busa mi-okupar sa ikaupat ug ikalimang dapit.

Sama ni Losiaboi, nadepensahan usab ni Mary Grace Delos Santos ang iyang trono isip Running Queen sa Sugbu human siya mikampiyon sa 21k women’s open sulod sa usa ka oras ug 24 minutos.

Nagsunod ni Delos Santos ang taga Manila nga si Marceil Manquilan (1:29.31) ug Sugbuanang si Madelyn Carter (1:30.00) alang sa ikaduha ug ikatulong dapit.

Nangharus usab si Ben Alejandrino sa 10k men’s division sa oras nga 33:42, uban sa mga runner ups nga sila si Philip Dueñas (34:05) ug Roland Montebon nga mirehistro og oras nga 34:24.

Ang garbo sa Southwestern University (SWU) nga si Mary Joy Tabal misakmit sa korona sa 10 women’s class sa oras nga 40:24, gisundan nila ni Elene Abing (44:48) ug Janice Lim (47:13) isip second ug third placer.

Si Joel Delposo sa University of Southern Philippines-Foundation maoy midaog sa 5k division sa oras nga 17:09, samtang si Jade Recto sa University of Cebu mao ang midominar sa 3k Fun Run.  – BANAT NEWS