Darts mosuba'g balik dinhi sa Sugbu

CEBU, Philippines - Napanglantawan ni National Darts Federation of the Philippines (NDFP) president Roberto 'Tito' Soncuya nga mosulbo'g balik sa duwang darts dinhi sa Sugbu.

Sinugdanan niini mao ang gipahigayong 1st M. Lhuillier Kwarta Padala and Osmeña-Rama National Darts Open nga gisalmutan og kapin sa 200 ka players lukop nasud.

Misubang og maayo ang darts dinhi sa nangaging mga katuigan, apan hinay-hinay misawop ug hangtod nga nawala sa eksena sa local sports.

Usa sa gitudlong rason ni Soncuya mao ang kakulang sa pribadong grupo nga mohatag og suporta sa duwa. Ug karon nga andam mopaluyo ang M. Lhuillier, si Soncuya maglaumon nga molampos sila sa ilang tinguha nga banhawon og balik ang darts sa nasud.

Ang torneyo nga kasamtangan karong gipahigayon diha sa Yayoy’s Grill and Resto Bar, gihulagway ni Soncuya nga maoy unang ang-ang sa dagku pang darts tournament nga mahitabo dinhi sa Sugbu.

“Malamang babalik ang popularity ng darts dito sa Cebu especially with the new generation of players,” matud pa ni Soncuya atol sa press conference niadtong miaging gabii didto sa Yayoy's Grill and Resto Bar.

Sa iyang bahin, si tournament host ug Cebu City councilor Raul 'Yayoy' Alcoseba mipasalig nga himuong tinuig ang maong torneyo.   (BANATNEWS)