CVIRAA ikaupat gihapon sa Palaro

CEBU, Philippines - Sa ikasiyam nga higayon, ang Central Visayas Regional Athletics Association (CVIRAA) nalandig  gihapon sa ikaupat nga dapit sa overall sa 53rd Palarong Pambansa nga natapos kagahapon didto sa Tarlac Recreational Center sa San Jose, Tarlac.

Basi sa points system, ang CVIRAA milublob sa ikaupat uban ang 231.17 points, ubos sa National Capital Region (NCR) nga maoy kampiyon bitbit ang 640 puntos.

Mipahiluna sa ikaduha ang Western Visayas uban ang 430 points, gisundan sa Southern Tagalo (Calabarzon) nga adunay 402.67 points.

Ang CVIRAA nga gilangkuban halos tanang atleta gikan sa Sugbu wala makabuylo sa archery, gymnastics, secondary athletics, boxing, badminton ug football.

Sa elementary girls volleyball, ang CVIRAA nga gimaneobra sa Catmon napilde ngadto sa Western Visayas.

Ingon sa gidemalas ang CVIRAA tungod kay bisan ang ilang pambato nga sila si Loren Dale Echavez sa swimming,   Bernardine ug Sallymae Siso sa lawn tennis ug Elona Dane ug Dannel Jay Tormis sa table tennis wala makabuga sa ilang abilidad.

Hinuon, si Echavez may iyang ikapasigarbo tungod kay nabuak niya ang 12-year-old record nga 100m freestyle aron pagpupo og usa ka gold uban ang tulo ka silvers.

Samtang si Niño Siso wala gyud makahagpat og medalya sa single's category hinuon nidaog siya sa team event, ang iyang igsuon nga si Sallymae nakadaginot og silver sa single's competition.

Si Crizabelle Merto maoy nahimong sentro sa 400 ka atleta ubos sa Central Visayas human iyang nasilhig og daog ang usa sa mga kategoriya. Siya'y nahimong rayna uban ang upat ka gold medals og usa ka silver sa archery.

Bisan pa sa standings sa CVIRAA, si DepEd-7 director Recaredo Borgonia mipadayag nga natagbaw siya sa gipakitang labok sa Central Visayas.

Sa kinatibuk-an, ang CVIRAA mihakot og 13 ka golds 30 ka silvers ug 18 ka bronzes.   (BANATNEWS)