CEBU, Philippines - Turno na sab sa University of San Jose-Recoletos (USJ-R) sa pagpakita sa ilang katakus batok sa Adamson University sa Shakey's V-League Season 7 karong alas-4 sa hapon didto sa The Arena sa San Juan City.
Sa ilang katapusang duha ka tuig nga pag-apil ning tinuig nga torneyo, ang USJ-R belles ni Cebu Sports of Hall of Famer coach Grace Antigua otomatik nga miabante sa quarterfinal round, apan ning higayona mag-atubang kini og laing senaryo kay moagi pa kini sa elimination phase.
Hinuon, ang former three-time Cebu Schools Athletic Foundation Inc. (CESAFI) women's champion, kinahanglan lang og usa ka daog aron moabante sa sunod nga hugna.
Lauman ni Antigua nga mopakita'g maayong labok ang iyang duha ka sinaligan nga si RP Team member Michiko Castañeda sa University of the Philippines ug former USJ-R stalwart Michelle Simbajon. Sila si Castañeda ug Simbajon moduwa uban nilang Mary Joy Bonita, Abigail Praca, Rachelle Hannah Singson, Mona Dubduban, Cristina Lavador, Avegale Getuaban ug Carla Garces. (BANATNEWS)