Creekside milangkat sa korona

CEBU, Philippines - Milampos ang Creekside sa ilang misyon pinaagi sa pagpukan sa Lawis, 102-97 sa ilang tinaktakay nga duwa sa "best-of-three" finals series aron pagsakmit sa titulo sa SK FDH Basketball League niadtong miaging gabii didto sa Mayors Satellite Gym sa Lorega-San Miguel ning siyudad.

Si Jaime Villaceran mikutlo dayon og 11 puntos aron hatagan og uno punto ang Creekside, 15-14 sa tunga-tungang bahin sa first period.

Gumikan sa kanipis sa labaw, nakuha sa Lawis ang momentum aron pagposte og 40-34 sa   halftime sa kombinasyon nilang Bryan Ruelan ug Jay-Ar Hassamal nga nagkumboya og 13 puntos.

Nagkainit ang duwa sa third period diin nagpuli-puli kini'g pasulod sa ilang opensiba hangtod nga nakontrolar sa Creekside ang duwa human sa sunod-sunod nga baskets nilang Villaceran ug Hobart Sanchez paingon na ngadto sa final period.

Si Villaceran, kinsa maoy napiling MVP, miposa og 27 puntos aron pangulohan ang Creekside, samtang ang managsuong   Wilson ug Samuel Blas nagkumboya og 23 puntos.

Ang pilderong Lawis gipangulohan sab ni Ruelan pinaagi sa iyang 35 puntos, si Hassamal miamot og 17 puntos, si Joseph Baylosis mitampo og 12 puntos, samtang si Mark Cuizon miabuno og 10 puntos. – BANAT NEWS