Gomez, Orcollo may tiket na sa Asiad

MANILA, Philippines - Kabilang na sina Roberto Gomez at Dennis Orcollo na tutumbok sa 16th Asian Games matapos na ipamalas ang kani-kanilang supremidad sa idinaos na qualification tournament sa Rizal memorial Billiards Center sa Malate, Manila.

Pinasargo ng 2007 World Pool Championship finalist na si Gomez si Orcollo, 13-11 sa finals ng 8-ball competition nitong Lunes.

Nakuha ni Orcollo ang karapatan na katawanin ang bansa sa Asiad na gaganapin sa Nov. 12-27 sa Guangzhou, China, matapos na bawian si Efren ‘Bata’ Reyes, 13-12 sa final naman ng 9-ball competition nitong Miyerkules.

Magpapatuloy ang Asiad qualification tournament sa Lunes.