Mactan Hotmen, Pimentel Brokerage mag-ilog sa titulo

CEBU, Philippines - Ang Mactan Hotmen ni team manager Collector Bingo Matugas ug ang D-Force Pimentel Brokerage mibuntog sa ilang tagsa-tagsa ka kaatbang aron magsangka sa kampiyonato karong adlawa sa basketball event sa Bureau of Customs (BOC) 1st Port of Cebu Sportsfest didto sa Benedicto College gym sa Brgy. Banilad, Mandaue City.

Ang Hotmen nangigo sa free throw sa nanghinapos nga bahin sa duwa aron maka-eskapo bitbit ang 77-72 nga kadaugan batok sa Chamber of Customs Brokers Inc. (CCBI), samtang ang Pimentel nagsalig sab sa ilang hugot nga depensa aron paglubong sa Assessment Division, 90-79.

Si Kenneth Kern Sesante maoy topscorer sa Hotmen sa iyang 15 puntos, gisundan ni Jessie Bugtai nga adunay 12 puntos lakip na ang crucial free throws. Sila si Ronnie Ruiz ug Ronnie Clapano nagkumboya og 21 puntos alang sa Hotmen.

Si Jeceril Borlado miburak og 28 puntos aron pangulohan ang CCBI, samtang ang sentrong si Takloy Moral Jr. miposa og 24 puntos.

Sa laing bahin, ang Pimentel Brokers ni team owner Marty Pimentel naghangad sa abilidad ni kanhi GMC Granny Goose point guard Michael Macasero, kinsa maoy topscorer sa maong team pinaagi sa 25 puntos. 

 Si Daniel Enriquez mibahog og 18 puntos alang sa pilderong Assessment Division. – BANAT NEWS