Cabancalan netters midaog tulo ka titulo

CEBU, Philippines - Tulo sa lima ka titulo ang nahipos sa Cabancalan netters sa badminton event sa 3rd Mayor Jonas Cortes Cup Sportsfest didto sa Mandaue City Cultural and Sports Complex.

Ang tandem nilang JP Remedio ug Bryan Bacalso mipilde sa ilang teammates   Arnold Pastrana ug Jun-jun Seno aron pagsakmit sa kampiyonato sa men’s doubles. Sila si Antonio Melendrez ug Daryl Cabilao sa Brgy. Guizo mipahiluna sa ikatulo.

Sa pikas bahin, sila si Vivian Remedio ug Flor Fornolles sa Cabancalan mipukan sab nilang   Teresita Dayanan ug Jonah Abellana sa Basak aron sakmiton ang korona sa women's doubles.

Sa mixed doubles, sila si Dio Ann Peña ug Alex Bergatin maoy nahimong kampiyon human gipilde ang tandem nilang Kevin Bergatin ug Flor Fornolles.

Sa laing bahin, sila si Jay Niño Tabelin ug Ferdinand de los Reyes maoy naghari sa 12-under boys category human gipukan ang managsuong Nipulan nga sila si Louie Raiz ug Ivan Dale Nipulan sa Maguikay.

Sila si Tabelin ug Mary Michael Alvarez maoy nanghawod sa mixed doubles class human gitumba silang Cleo Dayanan ug Jimmy Jayme sa Basak.

Sa volleyball dayun-dayun event, ang Alang-alang maoy milangkat sa titulo. Ang Tabok ug Cubacub maoy miangkon sa ikaduha ug ikatulo nga mga dapit.

Sa chess event, ang Labogon nagpabilin gihapon nga hari. Ang Labogon nagtabla sa Paknaan sa managsamang 9.0 puntos, apan ang Labogon mao ang midaog sa korona dihang ang ilang Board 1 player NM Leonardo Alidani mipukan ni Eden Diano.

 Gawas ni Aladino, sila si Ramsey Pedroza, Reynaldo Flores ug Danny Ralota nakatabang sab sa pagpadaog sa Labogon.

Ang Jagobiao maoy mi-okupar sa ikatulo nga dapit, samtang ang kampiyon sa miaging nga Subangdaku napunta sa ikaupat. – BANAT NEWS